UDAN

UDAN (Ude Desh ka Aam Naagrik)


Mihringte hi hmun pakhat chauha awm vek thei kan nih loh avangin veng te, khua te leh ram hrang hrangah te kan awm ngai a.  Chu chuan kan intlawhpawh tawnna tur hmanrua mamawhna a siam a, mamawh a awm miau chuan hmuhchhuaktu an lo awm a; chu’ng hmanraw chi hrang hrangte chu tangkai takin kan hmang mek zel a nih hi.
 
Mihringin ke (wheel) a hmuchhuah atang khan zinveivahna (transport) hmanrua tam tak hmuhchhuah a ni tawh a, hmuhchhuah mek zel a ni bawk a.  Hun, tha leh sum tam tak he hmasawnna hian min dahthattir (save) a ni.  Khawvela zinveivahna tam tak kan neih zinga him ber leh hun heh lo ber chu thlawhtheihna hmanga zin hi a ni.  Sum hrawm na deuh mah se, hun leh himna lam ngai pawimawhte chuan an hmang awl lo.  Amaherawhchu, mi naran mai mai tana hman leh ban phak a ni ve lo.

Hei hi hriain India sorkar chuan UDAN scheme chu a duang ta a ni.  He shceme lam pum chu Ude Desh ka Aam Naagrik a ni a, mizo tawng chuan Mi naran thlawhtir rawh (Let the common man fly) tihna mai a ni.  He scheme hi National Civil Aviation Policy (NCAP) hnuaia pawimawh ber pawl a ni a.  Ministry of Civil Aviation chuan kum 2016, June ni 15 khan he scheme hi a duang a ni. 
He scheme hian a tum ber chu India rama hmun chengkerh leh kilkawr zawka chengte awlsam zawka an intlawhpawh theih nan a ni.  Hei mai bakah hian chuan man pawh mi naranin an ban phak ve tura ruahman a ni a, darkar khat—KM 500 bawr vel—chuan man hi cheng 2500 chauh tura tih a ni.  Prime Minister Narendra Modi chuan he scheme hnuaia thlawna thlawk hmasa ber, Delhi-Shimla chu April ni 27, 2017 khan a vai liam a ni.  Hemi rual vek hian Kadapa Hyderabad-Nanded Hyderabad chu a thlawk ve bawk.

Airport Authority of India chuan he ruahmanna tihpuitlin nan hian dilna 27 lai a pawmsak tawh a ni.  India ram hmun hrang rhanga Airport hman lai 27, hman lutuk loh 12 leh hman loh 31 te chu he ruahmanna hnuaiah hian hman tura tih an ni.  Tun hnai mai khan he’ng hmuna thlawhtheihna service tur hian company panga chuan sorkar inzawrhna (bidding) chu an chhang a.  Chu’ng te chu—Air India, Spice Jet, Turbo Megha, Air Odisha leh Air Deccan te an ni. 

India ramah hian thlawhna hmanga zinveivahna hi nasa takin a pung a.  Kum 2016 khan vbc 10 air tickets hralh a ni a.  2015 aia a punna chu za zela 23 lai a tling pha a ni.  Sorkar hian kum 2022-ah chuan vbc 30 tling chho thei turin a beisei a ni.  Minister of State for Ministry of Civil Aviation Jayant Sinha chuan UDAN scheme forst phase hnuaiah hian airpost hman lutuk loh 12 leh hman loh 50 a huam (cover) dawn a ni.

He’ng airlines-te hian thlawhna kalkawng (route) 128 an changin khawpui 70 lai a huap a ni.  Thlawhna an hman leh a hlat zawng a zirin he’ng airlines-te hi sorkar chuan subsidy—cheng 2470-5100—kum thum chhung a pe dawn a ni.  Chu mai bakah airlines-te hian an bansan mai loh nan ‘regional routes’ ho-ah hian thlawh theih phalna bik (exclusive rights) kum thum chhung sorkar hian a pe bawk a ni.

Hemi piah lamah hian airlines-te hekna (loss) hi National Routes a thlawkte leh State Sorkarin an phuhruksak dawn bawk a ni.  Central sorkar chuan regional connectivity fund a ruahman a, domestic flight, national route a tlawk tur apiang te chu cheng 7500-8500 chawitir an ni ang.  Hei hian Hmar-Chhak state-te erawh a huam tel lo thung.  UDAN zin kawng hnuaia tel ve lote chuan passenger tinah cheng 50 vel an lak belh dawn tihna a ni. 

Ruahman dan chuan UDAN hnuaia zin man hi cheng 1,420 atanga 3,500 vel tura ruahman a ni.  Zin kawng thui zawng hi km 150 atanga 800 inkar tura tih a ni bawk.  Airlines-te hian an thlawhna seat awm zinga 50% chu UDAN fare (chuan man) biktuk angin an chhiar ang a, a bak zawng seat la bangah chuan thlawhna chuan man pangngai an chhiar thei thung ang. 

He ruahmanna hian Aizawl-Shillong pawh a huam tel dawn a.  Chuan man hi he scheme hnuaia a hniam ber aia tlawm a nih hmel a.  Cheng 1000 a pelh a rinawm loh.  Sumo leh bus-a kawng chep taka darkar 16 chuan ai chuan a hahdam daih dawn tihna a ni.  Sumo fare aia tlawm zawk a nih hmel lehnghal!