Ziakmi lar thenkhatte thu hnuhnung

Mihringte kan tawpna chu thihna a ni a.  Mi thi turte hian thuchah emaw thusawi hnuhnung an nei thin a.  Mizo dânah ngat phei chuan mi thi tur, a bikin chhungkaw pa ber thuchah hnuhnung phei chu a fate chuan tihpuitlin ngei an tum thin.
Ziakmite hi ‘thi thei lo awmchhun an ni’ an ti thin a, a chhan ber ni a lang pawh an thih hnu thlenga an thu leh hla te kan chhiar a, kan la zir thin vang a ni.  Khawvel huapa ziakmi hmingthang thenkhatten an thih hmaa an thusawi hnuhnung i lo tarlang dawn teh ang—

1. James Joyce (1882-1941): ‘Tumah hian an hrethiam lo em ni?’
He thu a sawi lai hian a fapa leh a nupui chu a kiangah an awm ve reng a.  A thih chhan hi a natna vanga zaipui a tawh a hlawhtlin loh vang a ni.  Amah hi Irish a ni a, khawvelin a hriatna chu a lehkhabu ‘Ulysses’, kum 1922-a tlangzarh kha a ni. 

2. Eugene O’Neill (1888-1953): ‘Ka hria. Ka hria.  Hotel pindanah ka piang a, hotel pindanah vek ka thi dawn tih hi.’
American lemchan ziak thiam hmingthang, Pulitzer prize leh Nobel prize hial pawh dawng thei hi new York khawpuia times square hotel-ah a piang a, Massachusetts khawpui Boston-a hotel pindan pakhatah a boral a ni.

3. Mark Twain (1835-1910):  ‘Mangtha. Kan intawn chuan . . .’
Mizoram thlengin a lehkhabu ziah ‘The Adventures of Tom Sawyer’ tal hre lo kan awm awm lo e.  Mizo tawng hiala lehlin a ni.  A lai ah hming tak chu Samuel Langhorne Clemens a ni teh daih a, he thu hi a thih dawn darkara a fanu kut vuan chunga a sawi a ni.  Vai film-a a changtupa pa thi tur ang deuhin a sawi tum tak a sawi zo hman lo a nih hmel.

4. Saki—Hector Hugh Munro (1870-1916):  ‘Kha meizial phiangsen kha tihlum rawh!’
He British pa hi Sipai officer huaisen leh ziakmi lar tak a ni a.  Indopui pakhatna lai khan a rammu ve a.  He thu hi France rama inbeihna hmuna a awm laia a sawi a ni.  German sniper chuan meizial sî chu hmuin amah hi a kap ta nia sawi a ni. 

5. Anton Pavlovich Chekhov (1860-1904):  ‘Champagne ka in hnuhnun berna pawh a lo rei ve leh ta hle mai.’
A nupui Olga Nipper sawi dan chuan ngawr (TB) natna a tawrh hrehawm lutuk tur chhawk nan doctor hnenah morphine a chiu leh zu (Champagne) pe turin a ngen a.  Tichuan doctor chuan zu chu a lamsak ta a ni. 

6. Franz Kafka (1883-1924): ‘Min tihlum rawh! Chuti lo chu tualthattu i ni mai!’
Kum zabi 20-naa German ziakmi lar bera chhal ngam Kafka hi a dam lai ai mahin a thih hnua lar a ni a.  Ngawr (TB) vanga thi niin he thu a sawi lai hian doctor hnenah Morphine, thihpui tham khawpa dose sang, a chiu turin a ngen a.  Mahse, a doctor hian a ngenna hi a hnawlsak a ni.  A boral dawn lai vel tak chuan a tawng thei tawh lo a ni.  A thuziak dan danglam tak avang hian sap tawngah pawh ama puala adjective ‘Kafkaesque’ tih a nei a ni.