AK-47

AK-47

Mihring hian kan kuttum leh tharum neih chauh kan thlamuanpui lo a ni tih chu ralthuam ropui tak tak neih kan intihhmuh mai bakah, neih belh zel kan tumna hian a tichiang hle awm e. Hmarua leh hriamhrei reng reng hi chi hnihah a hman theih—inven nan leh midangte rikrâp nan. Thil tangkai tak a nihna chen a awm. Muanna leh remna thlentu a ni thei.  Tunlai khawvelah ram leh ram indo an tlem takna chhan pawh hi nuclear ralthuam awm tawh vang a tih theih awm e.  Eng ram mah hian mihringte chhiat rupna tur hi thlentir kan hreh vek niin a lang.

Chutih rual erawh chuan ralthuam hi natna tih lohah chuan khawvela mihring leh thil nung dangte suat hnem ber a ni ve leh hlauh thung a.  Khawvel history kan en chuan indona leh thisen chhuahna a inziak tial ngiai nguai a, a inziah belh mek zel bawk.  Tun tumah hian khawvela ralthuam kan nei tawh leh neih mekte zinga hman làr ber leh mihring nunna la hnem ber, AK-47 bihchianna kan ilo nei dawn teh ang.  Mizote zingah pawh hre lo kan awm awm lo e. 

AK-47 tih hi a hmuchhuaktupa hming leh a hmuh chhuah kum lam tawi mai a ni.  Kum 1947 khan Russian mi, Mikhail Kalashnikov chuan he silai hi a hmuchhuak a.  Ani hi indopui pahnihna hunlaia Russian Tanker a ni a.  AK tiha A lai hi ‘Automatic’ tihna mai a ni.  He silai a hmuhchhuah avang hian hlawkna pakhat mah a neih phah lo.  A chhan chu Russia hi communist ram a ni a, patent leh ilo vel a nei thei lo.  Russian sorkar hnuaia hnathawk pakhat ve mai a ni. 

AK-47 hi Guinness Book of world record-a a lan dan chuan kawvela silai hman lar ber leh darh zau ber a ni.  Khawvel pumpuiah hian vaibelchhe sawm vel zet a awm nia hriat a ni.
  
AK-47 hian artillery, airstrike leh rocket te zawng zawng belhkhawm aiin mihring nunna a la hnem tawh zawk a ni.  Zirchianna a lan dan chuan kum tin mi 250,000 lai mai nunna a laksak thin a ni.

Khawvel ram hrang hrang 106-a Sipai leh special force te chuan AK-47 hi leklam berah an nei a.  Hei hi a chhan ber nia lang chu a man tlawm vang leh sik leh sa danglamah pawh a chhiat ve mai mai loh vang a ni.  Tui chhungah pawh awlsam taka hman theih a nihna te hian a hlutna a belhchhah niin a lang. 

Hei mai bakah hian a khawl hi mizo tawng taka ‘mawlmang’ tak a nih vang hian hmangtu an tam niin a lang bawk.  AK-47 hian part pariat chiah thiah emaw thlawn theih a nei a.  Naupang leh hmeichhe tan pawha harsatna awm miah loha khawih leh thiah sawm vel theih a ni.

A neitu Russia hian anmahni ram mai bakah ram hrang hrang 30 lai-ah siamchhuah phalna a pe a.  Chu’ng zingah chuan China, India, Israel, Egypt leh Nigeria te hi a lar zual an ni. 

Khawvela huapa a firfiaka che thin zinga lar ber, Osama Bin Laden-a silai ngainat ber chu AK-47 hi a ni.  A thlalak leh interview a neihna reng rengah tihlan a ni deuh ziah a ni.  Sawi dan pakhatah phei chuan AK-47 lo lang ve ziah hi America sorkar hnen atanga a dawn ni.  Kum 1970 chhoa Mujahidin hoin Soviet sorkar laka helna an chawh chhuah khan America chuan kawng tam takah hel pawlte hi a pui nasa em em a ni.

He’ng kan sawite mai bakah hian AK-47 hi Mozambique hnam puanzar (Flag) ah a chuang a ni.  Zimbabwe, East Timor leh Burkina Faso (1984-1997) te chuan an ‘coat of arms’ ah AK-47 hi an tilang a ni.  Anni mai bakah hian Lebanon rama hel pawl Hezbollah chuan AK-47 hi an pawl puanzarah an tilang bawk a ni.