NBA FINALS

Basketball ngainatu chauh ni lo, infiamna ngaina mite’n hmuhnawm kan tih em em leh nghahhlelh 2017 NBA finals khel tur chu tih chian a ni ta.  Thla leh June ni 2 atang hian western conference champion Golden State Warrior leh eastern conference champion Cleveland Cavaliers te chuan NBA champion nih tumin ‘The Finals’ tia a hming an vuah—NBA champion nih inchuna game chu an khel tan dawn a ni. 

Kum dang zawng aiin tun kum playoffs bik hi hmuhnawm loh tih a hlawh a.  Hei hi a chhan bulpui ber chu team pahnih tha fâl lutuk an awm vang a ni.  Warriors hian tun kum playoffs bikah hian hneh lo an la tawng lo a, an playoffs record hi 12-0 a ni.  Hei hi thil namai a ni lo.  Anthony Davis-a, 2017 all NBA first team, team New Orleans Pelicans meuh pawh playoffs khel phak zingah hian an tel pha lo a ni.  Warriors hian ‘The Finals’ hi a kum zâwna vawi thum an khelhna chiah a ni dawn a, Larry O’Brien trophy chawi tura rin hlawh ber an ni bawk. 

He dinhmun thleng tur hian Portland Trailblazers, Utah Jazz leh San Antonio Spurs te chu an sweep (vawi sarih khelh tura a zawna vawi li hneh) vek a ni.  Hei hian an thatzia a tilang chiang hle awm e.  Kum 2016 free agency-a Kevin Durant an lakluh hnu phei chuan Warriors hi dang thei an awm lo a ni ber.  An head coach Steve Kerr chu damlohna avangin an la chhawr theih hmel loh a, heti chung hian a awm loh hriat loh khawpin Warriors hi an khel tha a ni.  Finals kalkawngah hian harsatna lian tham sawi tur an tawk lo a, German ral lian an sawi ang deuhin an kawng daltu apiang chu hneh takin an tudawl zel a ni. 


Warriors ral lian lo dang tur hian Eastern conference lamah Cleveland Cavaliers chuan Boston Celtics 4-1 a hnehin finals hi an thleng ve bawk a.  Anni pawh hian Warriors ang thoin harsatna pakhat mah an tawk lo a tih theih.  Lebron James-a chet chhiat zanah tum khat chak ve bawk mah se, Cleveland lakah Celtics chu an la nau deuh a tih theih.  Finals thleng turin Cleveland hian Indiana Pacers, Toronto Raptors leh kan sawi tak Celtics te an hneh a ni.  Tin, Cleveland Cavaliers forward Lebron James hian NBA playoffs-a point score hnem ber Michael Jordan chu a khûm ta chiah bawk a ni.  Ani hian game 212 khelin point 5,989 a nei mek a, NBA chnchina playoffs ponts nei hnem ber a ni. 

June ni 1 zan atangin finals hi khelh tan tur a ni a.  Regular season-a che tha zawk Warriors-in home court advantage an nei ang.  Game hmasa pahnih hi Oracle Arena-ah khelh a ni ang a; a dawt leh pahnih hi Quicken Loans Arena-ah khelh a ni ang.  Chak zawk an la awm loh chuan home ve ve-ah game khat khelh leh a ni ang a.  Game seven khelh a ngaih hlauh chuan Warriors-in season an hman that rah sengin home court advantage an nei dawn a ni.  India ramah chuan June ni 2 zing atanga khelh tan a ni ang a.  Live telecast-in sony six-ah a en theih ang.  Game 1 hi dar 6:30 ah khelh a ni ang a, game 2 erawh a aia hma hretin dar 5:30 ah khelh a ni ang.  Finals en nuam vek u.  USA leh India hi darkar 12 leh a chanve velin a inthlau a ni.