BRICS

BRICS chungchanga i hriat àwm te:


Tanrual hi chakna a ni tih chu mi tupawh hian kan pawm tlangin a rinawm.  Pahnih hi pakhat aiin a tha zawk fo a; innghirngho ai chuan inlungrual hi hmasawnna rahbi pawimawh tak a ni.
 
Khawvela ram tam tak zingah hian mahni maia tla fâl ngam an vâng hle a, thiltithei ber America ram meuh pawhin thurualpui leh lamtang nei lo chuan a awm ngam bik lo a ni tih chu NATO a din atang hian a chiang mai awm e.  A ni lah tak a, tun ang khawvel, globalization age-ah tawh chuan ei leh bar (economy) leh ram himna (defense) atana pawimawh ber pawl chu lamtang (ally) tha tak neih hi a ni.  

Tun tumah chuan NATO chungchang sawi zui vak loin kan zo tlang ram nuam—Mizoram behna India leh a thurualpui ramte; BRICS tia an sawi kan bihchiang dawn a ni.  In sakna atana kan hman ‘brick’ nena ngaihpawlh loh tur a ni.  BRICS kan han tih hian he’ng ram hrang hrang panga—Brazil, Russia, India, China leh South Africa ramte intanna hawrawp hmasa ber lak khawm (acronym) a ni.

Kum 2009 atang khan kum tinin kan sawi tak ramte atanga an hotu lu ber theuh te chu an inhmukhawm thin a, chu chu summit tia sawi thin a ni.  2010 hma lam kha chuan BRIC tia sawi a ni thin a, South Africa telh a nih atang hian a tawpa S hi belh a ni. 
BRICS ram te hi ram inngeih ber ber an ni hran lo a.  Nimahsela khawvela ram tang chak leh thangduang ber ber (emerging economies) an nih avangin an inthlunzawm ti ila, kan sawi sual kher àwm lo e.  He’ng ram pangaah hian mihring tluklehdingawn 3.6 zet an awm a, chu chu kavela mihring awm zawng zawng zatve lawih a ni.  Ram panga te GDP belhkhawm hi Purchasing Power Parity (tualchhung pawisain ram danga thil a lei theih hlutna) atanga the chuan US $37 trillion lai a ni a, chu chu khawvel economy in a tharchhuah zaa 22% lai a tling a ni.  Tin he’ng ram panga te hian Foreign Exchange Reserve US $4 trillion lai an nei a ni.  Kum 2017 hian BRICS hi 5.3% in a thang dawn niin mithiamte chuan an sawi.

BRICS ram tina a hotu lu ber te hi a hruaitute chu an ni mai a.  Brazil president, Michel Temer; Russia president, Vladimir Putin; India prime minister, Narendra Modi; China President, Xi Jinping; leh South Africa president, Jacob Zuma te an ni.  Kum tin inhmuhkhawmin he pawl kal zel dan tur hi an rel thin a.  A tlangpui thuin ram panga te hian inhmuhkhawm hi an inthlen chhawk thin a, BRICS ram mai bakah sawm bik ram dang hruaitute pawh an tel chang a awm thin.  An hmalakna thar bet chu New Development Bank an din hi a ni awm e.  July 2015 a din niin US $100 billion working capital-a neiin tunah hian chak takin hmasawnna hna a kalpui mek a ni.  Chu mai bakah chuan BRICS hmachhawp pawimawh tak chu—2020 ah chuan an insumdawntawnna $500 billion tling pha ngei tura tan lak a ni. 

BRICS inhmihkhawm hnuhnun ber chu kum 2016 October ni 15 leh 16 inkar kha niin India ram state pakhat, Goa-a Benaulim khuaah neih a ni a.  Prime Minister Narendra Modi chu Host Leader niin ram dang hruaitute hi Taj Exotica-ah a lo mikhual a ni.  Ruahman anga thil a kal a nih chuan, kum 2017 BRICS inhmuhkhawm (summit) vawi kuana tur chu China rama Xiamen an tih hmunah nghah tum a ni.